Patay ang isang babaeng senior citizen matapos mabangga ng trailer truck sa C-3 Road sa Caloocan City nitong Lunes ng gabi, ayon sa ulat ng Unang Balita nitong Martes.
Kuwento ng driver na si Victor Meking, pa-U-turn siya nang mahagip ng likuran ng kaniyang truck ang biktimang si Juliet Bagtong.
Hindi raw napansin ng driver ang biktima at nalaman lang daw niyang may nabangga siya nang magsigawan ang ilang saksi.
Agad namang humingi ng saklolo sa pulisya ang driver at humingi rin siya ng tawad sa pamilya ng biktima dahil hindi raw niya sinasadya ang nangyari.
Hindi pa nagbibigay ng pahayag ang Caloocan Police tungkol sa insidente. —KBK, GMA News
