Tatlo ang nasawi--kabilang ang dalawang estudyante-- nang masalpok ng pampasaherong bus ang isang tricycle na minamaneho ng senior citizen na driver sa Binalonan, Pangasinan.
Sa ulat ni Gab de Luna sa GMA Regional TV News nitong Huwebes, sinabing nangyari ang insidente sa MacArthur Highway sa bahagi ng Barangay Cili nitong Huwebes ng umaga.
Sa kuha ng CCTV camera, makikita na galing sa barangay road ang tricycle na minamaneho ng 66-anyos na driver, at tumawid sa highway kung saan siya nabangga ng paparating na bus.
Ayon sa pulisya, kaagad na nasawi ang driver ng tricycle, at dalawa nitong pasahero na isang babaeng college student, at isang lalaki na grade 10 student.
Dalawa pang pasahero ng tricycle ang malubhang nasaktan at dinala sa ospital.
Inihayag din ng pulisya na nakausap na ang kompanya ng bus ang pamilya ang mga biktima at nagkaroon na sila ng kasunduan.-- FRJ, GMA Integrated News
