Ibinahagi ng American actress-writer na si Kylie Brakeman ang nakatutuwa niyang reaksyon matapos siyang pabirong madawit sa isyu nina Kylie Padilla at Aljur Abrenica.

Sa kaniyang Twitter, nagbahagi ang “The Kids Tonight Show” writer ng screenshot ng ipinadalang mensahe sa kaniya na nagtatanong: “Hey kylie what's the truth?”

Kasama ng mensahe ang bahagi ng pahayag ni Aljur tungkol sa hiwalayan nila ni Kylie: "Kylie please tell them the truth … Tell them who cheated first. Tell them who wrecked our family. Tell them why I gave up on you, not on our family. The people deserve to know. Tell them who are you with right now."

"I really didn’t know what I was expecting," komento ng Amerikanang aktres, na isa ring comedian.

Dinaan din ni Kylie Brakeman sa tawa ang birong pagdawit sa kaniya ng ilang netizens tungkol sa isyu.

"Have you guys ever been pranked by an entire country because that’s what the Republic of the Philippines has done to me overnight. This rules hahahaha" anang American actress.

Nitong Martes, binasag ni Aljur ang kaniyang katahimikan sa isyu at hinikayat si Kylie na "tell them who cheated first."

Ilang oras matapos maglabas ng pahayag si Aljur, nag-post naman ng cryptic quote si Kylie sa kaniyang Instagram story na nagsasabing “Never underestimate a man’s ability to make you feel guilty for his mistakes.” —LBG, GMA News