P70-M jackpot sa 6/58 draw at P20-M sa 6/45, parehong tinamaan

Magkahiwalay na napanalunan ng dalawang mananaya ang jackpot prize sa Ultra Lotto 6/58 at Megalotto 6/45 draws nitong Biyernes ng gabi, Enero, 14, 2022.

Sa website ng Philippine Charity Sweepstakes Office (PCSO), nakasaad na isa ang tumama sa Ultra Lotto 6/58 draw na ang lumabas na kombinasyon ng mga numero ay 53-10-19-21-42-47.

Ang kabuuang premyo nito ay umabot sa P70,258,716.80.

Sa kasabay nitong Megalotto 6/45, isa rin ang nakasaad na tumama sa lumabas na mga numerong 24-31-20-17-13-18.

Umabot naman ang premyo nito sa kabuuang P20,212,102.00.

Nitong Huwebes lang, Enero 13, nagpatuloy ang draw sa lotto matapos na magpatupad ng break ang PCSO mula Enero 10 hanggang 12 dahil na rin sa pagdami ng mga tinatamaan ng COVID-19.

--FRJ, GMA News