May nanalo na sa Grand Lotto 6/55 draw nitong Sabado, Oktubre 1, 2022, na umabot sa mahigit P236 milyon ang premyo at marami sila.
Sa website ng Philippine Charity Sweepstakes Office (PCSO), nakasaad na 433 na mananaya ang maghahati-hati sa jackpot prize na P236,091,188.40.
Ang lumabas na kombinasyon ng mga numero ay 09-45-36-27-18-54.
Wala namang tumama sa kasabay nitong draw na Lotto 6/42.
Ang number combination na lumabas ay 37-42-14-09-13-04, at mayroon itong kabuuang premyo na P24,908,649.60.
Samantala, umabot na sa P110,134,645.60 ang jackpot prize sa Superlotto 6/49, na hindi pa tinatamaan.
Posible ring umabot sa P100 milyon ang premyo sa susunod na draw ng Ultra Lotto 6/58.--FRJ, GMA News
