Natumba at hindi kaagad nakatayo ng isang lola at kaniyang batang apo nang sumakay sila sa escalator ng isang shopping center sa China. Alamin ang kanilang naging kalagayan matapos ang nahuli-cam na insidente.
Sa ulat ng GMA Integrated Newsfeed, makikita na may tungkod na ang lola at hawak niya ang kaniyang apo nang sumakay sila ng escalator sa isang shopping center sa Hubei, China.
Pero katatapak pa lang nila sa escalator nang mawalan ng balanse ang lola at natumba. Nahila rin niya ang kaniyang apo kaya natumba rin.
Dahil mahina na ang tuhod ng lola, hindi na niya nagawang makatayo pa habang patuloy na umaandar paakyat ang escalator.
Ang kaniyang apo, nakatumbang nagtuloy-tuloy na nakaakyat, pero ang lola, ilang ulit nagpagulong-gulong sa bawat baytang ng escalator.
Tinatayang isang minuto bago may nakakita sa kahabag-habag na sitwasyon ng matanda at napatay ang escalator sa pamamagitan ng pagpindot sa emergency button.
Ayon sa pamunuan ng shopping center, ligtas ang bata habang nagtamo ng injuries ang lola na dinala sa ospital.
Stable na umano ang kalagayan ng lola na patuloy na nagpapagaling.
Tiniyak din ng pamunun ng shopping center na tutulungan nila ang lola sa pagpapagamot. -- FRJ, GMA Integrated News
