Mahigit 10 katao ang isinugod sa ospital nang makaranas ng pananakit ng tiyan at pagsusuka dahil umano sa kinain nilang halo-halo mula sa isang tindahan sa Kidapawan City.
Sa ulat ng Balitanghali nitong Martes, sinabing isa-isang dinala sa pagamutan ang mga nakakain Sabado ng hapon.
Kabilang sa mga pasyente ang isang 3-anyos na bata.
Pansamantala munang ipinasara ang tindahan samantalang hinihintay ang resulta ng test mula sa sample ng halo-halo.
Sinubukan ng GMA Integrated News na kunan ng panig ang may-ari ng tindahan, ngunit tumanggi ito.
Gayunman, agad silang nakapagbigay ng ayuda sa mga biktima.
Ayon sa huling ulat, may tatlong pasyente pa ang nasa ospital.—Jamil Santos/AOL, GMA Integrated News
