Tatlong lalaki ang inireklamo sa pagpatay ng isang pusa sa Dinalupihan, Bataan.
Ayon sa ulat sa 24 Oras Weekend ngayong Linggo, huli sa CCTV ang pagkukumpulan ng mga suspek sa isang kalsada.
Maya-maya pa, may bitbit na silang net at mga pamalo.
Nakasilid sa net ang isang patay na pusa.
Ayon sa may-ari ng pusa, nakatakas ang kanilang alaga at sinabihan daw sila ng kapitbahay na may pusang hinuli sa kanilang lugar.
Nang puntahan nila, patay at duguan na ang kanilang pusa.
Hinala nila, kinorner at pinalo ito ng baseball bat at golf club.
May nagreklamo raw kasi na nangagat ang kanilang pusa. Ang tatlong suspek sa pagpatay nito ay inireklamo na sa piskalya. Wala pa silang pahayag. — BM, GMA Integrated News
