Nasawi ang isang 61-anyos na lalaki matapos siyang salpukin ng isang motorsiklo sa Padre Garcia, Batangas. Ang nakabanggang rider, sugatan din.
Sa ulat ni Hazel Abiar sa GMA Regional TV Balitang Southern Tagalog nitong Miyerkules, makikita sa kuha ng CCTV camera na lumabas mula sa subdibisyon ang biktima para tumawid upang bumili sa tindahan na nasa kabilang bahagi ng national road sa Barangay Banaba.
Malapit na sa gitna ng highway ang biktima nang mahagip siya ng motorsiklo na minamaneho ng 31-anyos na rider.
Sa lakas ng pagkakabangga, parehong tumilapon ang biktima at ang rider.
Idineklarang dead on arrival sa pagamutan ang biktima, habang nagpapagaling pa sa ospital ang rider.
Nagkausap na umano ang pamilya ng biktima, at ang pamilya ng rider. Naiuwi na rin sa Quezon ang mga labi ng biktima.-- FRJ, GMA Integrated News
