Nakunan ng CCTV ang salpukan ng dalawang motorsiklo sa Barangay Poblacion 2, Mulanay, Quezon kung saan isa ang patay, at dalawa sugatan nitong Sabado ng gabi.
Dead on arrival sa isang pagamutan ang rider na kinilalang si Jay-M Dela Cruz, 16-anyos, habang malubha namang nasugatan ang kanyang angkas na si Jelmar Castilleja, 13-anyos.
Base sa report ng Mulanay Municipal Police Station (MMPS), tinatahak nina Jay-M at Jelmar ang highway nang salpukin sila ng humaharurot na isa pang motorsiklo matapos nilang mag-overtake.
Makikita sa kuha ng CCTV na nasa tamang linya ang motorsiklo at ang isang kasalubong na motor. At makikita rin na sumalubong sa linya sina Jay-M at Jelmar dahilan para masalpok sila.
Makikita rin ang pagtilapon ni Jelmar sa gilid ng highway.
Ginagamot ngayon sa pagamutan ang dalawang sugatan. —LBG, GMA News
