Patay ang dalawang tao at sugatan ang anim na iba pa sa banggaan ng tricycle at truck sa Sapian, Capiz, ayon sa ulat ni Adrian Prietos sa "Unang Balita" nitong Biyernes.
Nangyari ang banggaan sa Baranggay Maninang sa bayan ng Sapian, kung saan dalawa ang namatay, at anim naman ang sugatan.
Ayon sa pulisya, biglang nawalan ng control ang driver ng tricycle na si Jordan Viloria, at nabangga ang kasalubong na truck na minamaneho ni Vergilio Pabalona.
Sa lakas ng impact ay halos nawasak ang unang bahagi ng tricycle at naipit ang pasahero sa loob. Ang iba ay tumilapon pa sa kalsada. —Sherylin Untalan/LBG, GMA News
