Patay ang isang pulis sa Los Banos, Laguna matapos siyang barilin sa likod ng ulo ng kaniyang tauhan at tagasingil sa negosyong pautang ng biktima.
Sa ulat ng GMA News TV "Quick Response Team" nitong Huwebes, kinilala ang biktima na si Police Senior Master Sergeant Dominic Doctor Obligado. Pinaghahanap naman ang suspek na si Ruel Nabatilan.
Sa imbestigasyon ng pulisya, lumitaw na nag-iinuman ang dalawa na nauwi sa pagtatalo nang hindi makapag-remit ng singil sa pautang si Nabatilan.
Inikutan daw ng suspek ang biktima na nakaupo at saka binaril sa likod na bahagi ng ulo.
Hindi na umabot ng buhay sa ospital ang biktima, habang tumakas naman ang suspek.
Napag-alaman na nahuli si Nabatilan noong 2013 dahil sa kaso ng droga.
Nang makalaya pagkaraan ng isang taon, naging kaibigan at tauhan siya ni Obligado.--FRJ, GMA News
