Sa Memorial Day commemoration ng Israel, kasamang inalala ng Israel Embassy ang limang Pilipino na kabilang sa mga nasawi sa ginawang pag-atake ng Hamas noong October 7, 2023.
Sa pahayag ng embahada nitong Miyerkules, inihayag ng Israel na kasama ang mga Overseas Filipino Workers na sina Angelyn Aguirre, Loreta Alacre, Grace Cabrera, Paul Vincent Castelvi, at Filipino-Israeli soldier na si Sergeant Cydrick Garin, sa mga sibilyan at sundalo na nasawi sa Hamas attack, sa ginawang paggunita sa kanilang Yom HaZikaron (Memorial Day).
Kasama sa seremonya ang pag-aalay nila ng dasal at sandali ng katahimikan para sa limang Pinoy, 760 sundalo, 834 sibilyan at 68 dayuhan, na nasawi sa naturang pag-atake ng Hamas.
Ito ang unang pagkakataon na ginunita ng Israel ang kanilang Memorial at Independence Days sa gitna ng kanilang pakikidigma sa Hamas group.
“Today is an opportunity to recognize OFWs in Israel. Most of them are still in our country, and they feel at home and loyal to their employers. Aside from OFWs, Filipino volunteers are in Israel to express unity with Israel during this difficult time. I could feel the spirit of support and solidarity among our friends from the Philippines,” ayon kay Israeli Ambassador to the Philippines Ilan Fluss.
“We feel mixed emotions - sadness on Memorial Day but happiness for Independence Day. Our life in Israel is in between remembering the loss of lives and celebrating the freedom, independence, and the great success of the state of Israel that shines amongst the nations,” dagdag niya.
Ginanap ang Memorial Day nila sa Manila noong May 13, habang ang 76th Independence Day ay nitong May 14. —FRJ, GMA Integrated News
