Inilahad ni Iya Villania na hindi planado ang kaniyang pagbubuntis sa ikalimang anak nila ni Drew Arellano. Gayunman, itinuturing ito ng mag-asawa bilang isang "welcome surprise."

"Every time people ask how was this planned, I always tell them, may umaabot ba sa lima na planado?" biro ni Iya sa "Fast Talk with Boy Abunda" nitong Biyernes.

"So no, this was not planned. But it was always a welcome surprise. It was always a welcome accident," pagpapatuloy ni Chika Minute host.

"Because I always knew that until I wasn't tied or until he was tied, I always knew there was a possibility."

Inihayag ni Iya na baby girl ang kanilang ikalimang anak, at inaasahan ang kaniyang panganganak sa unang linggo ng Pebrero sa susunod na taon.

Hindi pa nila ito pinapangalanan.

Natanong din ni Tito Boy ang tungkol sa planong pagpapatali nina Iya at Drew, o paghinto sa kaniyang panganganak.

"Yes there was a plan," sabi ni Iya.

"Saan kayo hihinto?" tanong ni Tito Boy.

"Siguro dito!" natatawang tugon ni Iya.

Ibinahagi ni Iya na tingin pa ni Drew noong una na hindi siya mabubuntis.

"When we were not showing it whether or not I was pregnant, sabi ko 'Love I just want to give you a heads up because I really have a strong feeling that I'm pregnant," kuwento niya.

"Sabi niya (Drew) 'Hindi 'yan!' Sabi ko, 'Okay! Pero tingin ko talaga I am,'" pagpapatuloy ni Iya.

"Sabi ko 'Love I just want to let you know because I know out of the two of us ako pa 'yung, 'we might have another baby' and he would always be like 'Hindi, okay na tayo.'"

Hanggang sa makumpirma nga ni Iya na buntis siya, at tinanggap naman ito ni Drew.

"He said 'Love, kung meron, okay! Kung wala, okay pa rin!' Sabi ko 'Okay!' It made me feel a lot better."

Inanunsyo ni Iya ang kaniyang pagbubuntis nitong Setyembre. May apat na silang anak ni Drew, na sina Primo, Leon, Alana, at Astro. — BAP, GMA Integrated News