Mapapanood din sa Netflix ang blockbuster movie na "Hello, Love, Again" sa Pebrero.
Nakasaad na "coming soon" sa naturang streaming platform ang pelikula nina Alden Richards at Kathryn Bernardo.
Nakatakdang ipalabas sa Netflix ang love story nina Ethan at Joy simula sa Pebrero 13.
Nitong nakaraang Nobyembre unang ipinalabas sa Pilipinas ang "Hello, Love, Again," at sumunod na rin sa iba't ibang bansa.
Gumawa ito ng kasaysayan bilang highest-grossing Filipino film of all time matapos tumabo sa takilya ng mahigit P1 bilyon.
Ang "Hello, Love, Again" na pagpapatuloy ng kuwento nina Joy at Ethan sa Canada, ay sequel sa 2019 blockbuster film na "Hello, Love, Goodbye," na nagsimula sa Hong Kong.
Sa Indonesia naman maghahatid ng kilig sina Alden Richards at Kathryn Bernardo sa pamamagitan ng kanilang blockbuster movie na "Hello, Love, Again."
Simula sa Enero 17, mapapanood din sa mga sinehan sa Indonesia ang naturang pelikula. -- FRJ, GMA Integrated News
