Binawi ng Miss Grand International ang 2nd runner-up title mula kay Ms. Myanmar Thae Syu Nein.
Sa social media post nitong Lunes, ipinaliwanag ng beauty organization na ang desisyon ay bunga ng "inappropriate behavior and actions that violated several regulations."
"This announcement is made for your information," dagdag nito.
Una rito, iniulat ng Thai media na tinapos ng presidente ng Miss Grand International na si Nawat Itsaragrisil ang franchise sa Myanmar sa pageant makaraang tanggihan ni Thae Syu Nein ang korona bilang second runner-up sa kompetisyon.
"What makes her so delusional?" saad ni Nawat sa Khaosod English. "If she wants first place and must have it, I suggest she create her own pageant so she can win every title."
Ayon sa ulat, nagpatupad ang MGI ng lifetime ban laban kay Miss Grand Myanmar National Director Htoo Ant Lwin dahil sa "lack of sportsmanship and business credibility."
Matapos ang naturang coronation night, inihayag ni Thae Syu Nein sa kaniyang Facebook Live na hindi niya tatanggapin ang kaniyang korona.
"I'm not controlled by anyone. I just take my own decision. I give back my second-runner up crown just because we don't get what we deserve," saad niya.
Si Rachel Gupta ng India ang nagwagi sa naturang kompetisyon, at 1st runner up si CJ Opieza ng Pilipinas. — FRJ, GMA Integrated News
