Ikinalungkot ni Julie Anne San Jose na hindi siya nakasama sa concert ni Regine Velasquez matapos siyang isugod sa ospital. Kumusta na kaya ang kaniyang kalagayan?
Sa Chika Minute report ni Aubrey Carampel sa GMA News "24 Oras" nitong Martes, sinabi ni Julie Anne na dinala siya sa ospital dahil sa matinding pananakit ng tiyan at migraine.
Ayon sa Kapuso star, nakapag-ensayo na siya isang araw bago ang naturang concert ni Regine. Kaya naman inaasahan niya ang naturang production number sana nila ng Asia's Songbird.
"Paggising ko, bigla na lang ako nagsusuka tapos it went on for hours eh. Tapos sabi ko ayoko munang dalhin 'yung sarili ko sa ospital kasi baka mamaya mawawala naman or whatsoever ganiyan," kuwento ni Julie Anne.
"Pero like talaga nung nagdire-diretso na hindi na talaga tumitigil, nagpa-ospital ako kasi. Natakot din ako at tsaka 'yung family ko natakot din sila. Even [Rayver Cruz] was there, pinuntahan din niya ako sa hospital," patuloy niya.
Nagpapasalamat si Julie Anne na naunawaan ni Regine ang kaniyang kalagayan.
"Siyempre nakaka-feel bad pa rin kasi talagang looking forward ako na makasama ulit si Ate sa stage," sabi ni Julie Anne.
Bago nito, nanggaling at nagtanghal si Julie Anne sa Canada kasama ang iba pang kapuwa niya Sparkle stars.—FRJ, GMA Integrated News
