Nagsisilbing inspirasyon ni Angel Guardian ang anak ni Iza Calzado na si Baby Deia Amihan, para pagbutihin ang kaniyang karakter sa “Sang’gre” na tagapangalaga ng Brilyante ng Hangin na “Deia” rin ang pangalan.
“I promise po na gagawin ko ang best ko. Hindi ko sasayangin ‘yun. Kasi Tito Boy, nakita ko po kung gaano ka-special si Deia kay Ms. Iza,” sabi ni Angel sa “Fast Talk with Boy Abunda.”
“And from that moment, I swear siya po talaga ‘yung reason bakit naging mas motivated ako,” madamdaming sabi ni Angel.
Ayon kay Angel, nag-audition siya para sa “Sang’gre” at ibinigay sa kaniya ang karakter na si Deia.
“I actually auditioned for two roles, Flamarra and Deia. But like I said to Ms. Iza the moment na nabasa ko ‘yung character ni Deia, iba po ‘yung naramdaman ko. Pinag-pray ko pero hindi ko hiningi particularly na makuha ko ‘yung role ni Deia,” kuwento ng Sparkle actress.
“I prayed for it na, ‘Lord sana ito na ‘yun.’ And God opened it,” sabi pa ni Angel.
Ayon naman kay Iza, nagkatrabaho na sila ni Angel sa “Shake, Rattle & Roll.” Dito, ikinuwento sa kaniya ng dalaga na natanggap nito ang role na si Deia sa Sang’gre.
“Ako ‘yung parang ‘Oh my God! She’s the one playing Deia. Siyempre sa akin, it matters eh, importante. That moment I was grateful that na pinagtagpo kami ng Panginoon,” sabi ni Iza.
Si Iza ang gumanap bilang ang orihinal na Amihan sa Encantadia noong 2005.
Sinabi ni Iza na ipinagkakatiwala na niya ang karakter na si Deia kay Angel.
“We had a moment. Ipinagkatiwala ko sa kaniya tapos you recognize. Kaya rin siguro napaka-special ng Amihan sa akin. Of course I had Te Amo before that, but it was really Encantadia, Amihan that put me on the map, ‘yung talagang tinatakan,” sabi ni Iza.
Inilarawan ni Angel na tila hindi siya makapaniwala habang inaanunsyo ang balita kay Iza.
“‘Yun nga po ang sinasabi ko kay Ms. Iza, sobrang perfect ng timing, as in, that moment para akong nasa cloud nine, hindi ko lang mapaniwalaan na binigyan ako ng chance na magkasama kami that moment. Natanong ko sa kaniya personally and na-confirm ko, pangalan talaga ng anak ni Ms. Iza,” sabi ni Angel.
Hiniling naman ni Iza na maging matagumpay din si Angel sa pagganap niya bilang si Deia.
“Sabi ko nga, nawa’y ‘yung suwerte na ibinigay sa akin ng Amihan ngayon naman na siya si Deia ay makuha niya rin ang same, if not more na suwerte na ‘yun,” sabi ni Iza. —Jamil Santos/ VAL, GMA Integrated News
