Isa sa bagong segment sa "The Boobay and Tekla Show" ang "phone raid" kung saan babasahin ang text messages sa cellphone ng guest sa show. Si Sofia Pablo, tila hindi ito kinaya nang mapiling basahin ang text na ayaw sana niyang mapili.
Sa nakaraang episode ng "TBATS," kasama ni Sofia na naging bisita sa show ang kaniyang ka-love team na si Allen Ansay o Team Jolly.
Sa phone raid segment, hahalungkatin ang text messages sa kanilang cellphone batay sa ramdom number na babanggitin ng production staff.
Unang isinabak ang cellphone ni Allen, na ang lumabas na text sa binanggit na number ay nagsasaad na: "Ok Po."
Ayon kay Allen, text iyon sa isang delivey.
Sa isa pang text message sa phone ni Allen, "Sino po?." naman ang nakalagay na galing pala mismo kay Sofia.
Nang isalang na ang cellphone ni Sofia, lumabas sa napiling numero ang text message ng kaniyang daddy na nagtatanong ng, "Work for what?"
Ipinaliwanag ng young Kapuso star na kakauwi pa lang niya noon galing sa Singapore at may gagawin pa siyang trabaho.
Sa kalagitnaan ng paghahanda sa muling pagsilip sa kaniyang cellphone, binasa ni Sofia ang text messages sa phone niya, at natatawa niyang sinabi na huwag sanang mapili ang number 8.
Pero nang banggitin ng staff ang numero, pinili nila ang number 8 kaya napahiga si Sofia sa sahig na walang tigil sa pagtawa.
Ano nga ba ang nakalagay sa text no. 8 sa cellphone ni Sofia? Panoorin ang nakatutuwang phone raid ng TBATS. -- FRJ, GMA Integrated News
