Ipakikilala bilang candidate number 8 sa Binibining Pilipinas pageant si "Hipon Girl" Herlene Budol.
Sa kaniyang Instagram account, nag-post ng kaniyang larawan si Herlene na hawak ang numero 8 na itinuturing ng kaniyang manager na suwerte sa Chinese.
"Ang kahalagahan ng number 8 ay indi dapat palampasin," sabi ni Herlene sa caption. "Professionalism, material freedom, kasaganaan and self-confidence ay nauugnay daw sa number 8 ng numerology. Isn't it amazing!"
Inihayag din ni Herlene na Nicole Budol na ang itatawag sa kaniya para na rin sa pageant.
Mula nang sumabak sa Bb. Pilipinas, marami ang humanga sa transformation ni Nicole sa kagandahan.
Ikinuwento noon ni Nicole na tinawag siyang "hipon" nang sumasali siya sa mga local pageant dahil sinasabihan siyang katawan lang niya ang maganda--at 'tapon ulo."
Sa hiwalay na post, ibinahagi rin ni Nicole na tinawagan siya ni Willie Revillame nang ianunsyo na kabilang siya sa mga nakapasok na magiging kalahok sa Bb. Pilipinas.
"Masaya na may halong iyak ako habang kausap ko cya sa phone. dahil cya ang humulma sa akin at sobrang proud cya sa akin at natutuwa po cya sa akin kasi lagi ko daw cya ina-acknowledge! d ko raw cya nakakalimutan," saad niya sa caption ng larawan nila ng TV host.
Dating kalahok sa isang game segment ng dating "Wowowin" si Nicole o Herlene, bago siya kinuhang co-host ni Willie sa programa. Mula noon, nagtuloy-tuloy na ang career ni Nicole at lumabas sa iba't ibang show ng GMA. --FRJ, GMA News
