Nagdadalamhati ang aktres na si Alex Gonzaga matapos niyang kumpirmahin na nagkaroon siya ng miscarriage o hindi natuloy ang kaniyang pagbubuntis sa una sana nilang anak ng asawang si Mikee Morada.
Sa Instagram ng actress-vlogger nitong Linggo, ibinahagi niya ang kaniyang pregnancy journey kasama si Mikee matapos na mag-positive ang kaniyang pregnancy test.
Dalawang buwan na raw ang nakalilipas nang malaman nila na magiging magulang na sila. Pero tatlong linggo ang nakararaan, nalaman nilang posibleng nagkaroon si Alex ng anembryonic pregnancy, o hindi na o timigil na sa pag-develop ng embryo.
"Our doctor advised us to wait for the process to naturally take its course. So we had to wait for awhile for the pregnancy to finally end before we can tell our story," saad ni Alex.
"The waiting and praying tested our faith and there were a lot of crying. Every day we were clinging on to a miracle that an embryo would still appear but last Tuesday (October 12), the Lord's will prevailed and we finally closed the book of our first pregnancy," patuloy niya.
May emosyonal na mensahe na ginawa si Alex para sa kaniya sanang unang baby.
"To our baby whom we almost had, thank you for giving mommy and daddy joy even for a short span," ani Alex.
Sinabi ni Alex na ibinahagi nila ni Mikee ang nangyari sa kanila para magbigay ng suporta sa ibang katulad nila na dumaan sa katulad na karanasan.
Nagpasalamat din ang mag-asawa sa mga nakaunawa sa kanila.
"To any couple who's going through this or who might go through this pain, don't ever lose hope. It's not your fault this happened," ayon kay Alex.
"Mikee and I held on to our Lord Jesus to prepare and help us accept our situation. He blessed us with a kind of love that is ready to understand," dagdag niya. "We know that in His perfect time He will bless us with our ultimate desire."
Enero 2020 nang maging engaged sina Alex at Mikee, at nagpakasal sa Palawan nang taong din iyon.--FRJ, GMA News
