Sa pagbisita ni Richard Yap sa "The Boobay and Tekla Show," ilang katanungan ang game na sinagot ng bagong Kapuso actor.
Ayon kay Richard, wala raw talaga sa plano niya ang mag-artista at nagsimula raw ito nang mag-model siya para lang magkaroon ng dagdag na kita.
Pero habang wala pa sa showbiz, tinanong nina Boobay at Tekla ang aktor kung sino ang mga artistang crush niya noon.
Unang binanggit ni Richard ang pangalan ni Dawn Zulueta, na sinundan ni Angel Locsin at pangatlo si Solenn Heussaff.
Sinabi rin ni Richard na nagkaroon siya ng pitong nobya bago siya nakapag-asawa ng isang half Filipina-half Spanish.
Nang tanungin kung ilang taon siya nang unang magkaroon ng nobya, sinabi ni Richard na 16-anyos, na kinalaunan ay itinama niya na 14-anyos lang noong first year high school siya.
Panoorin ang buong panayam kay Richard sa "TBATS" at ano ang sagot niya nang tanungin kung handa ba siyang tumanggap ng gay role. -- FRJ, GMA News
