Inihayag ng Binibining Pilipinas Charities, Inc. (BPCI) na kanselado na muna ang grand coronation night ng Binibining Pilipinas 2020 dahil sa coronavirus disease 2019 (COVID-19).
"BPCI supports the government's quarantine restrictions and efforts to curb the further spread of COVID-19 which has now become a global pandemic," ayon sa kanilang pahayag nitong Lunes sa Facebook post.
Patuloy nila, "BPCI recognizes the pressing and urgent need to protect the health and safety of the candidates, their families and friends, all the passionate pageant supporters, and the general public."
Sa kanilang anunsyo noong nakaraang Marso, iniurong nila sa May 31 ang coronation nights mula sa orihinal na planong idaos ang kompetisyon noong nakaraang Abril.
Sa kanilang bagong abiso, walang binanggit ang BPCI kung kailan na gaganapin ang koronasyon. Bagkos, nakasasalay na umano ito sa "guidelines and regulations" na ipalalabas ng pamahalaan sa darating na panahon.
"Rest assured that BPCI still intends to hold the Pageant with its partners and sponsors as soon as the situation permits when the threat of transmission and infection is at its minimum," ayon sa pahayag.
Nitong Pebrero, ipinakilala ng Binibining Pilipinas pageant ang mga kandidata na maglalaban-laban sa limang korona na: Globe, Supranational, Intercontinental, Grand International, at International. —FRJ, GMA News
