Isang lalaki na kalalaya lamang noong Oktubre ang balik-piitan dahil sa pagpapatakbo umano ng drug den sa Barangay Fort Bonifacio sa Taguig City.
Sa ulat ni Darlene Cay sa Unang Balita nitong Biyernes, sinabing sinalakay ng mga operatiba ng Fort Bonifacio substation 1 ang bahay ng suspek na si Joey Tabada sa bisa ng search warrant.
Sa paghahalughog ng pulisya sa bahay ng suspek, nakita nila ang isang pouch na naglalaman ng hinihinalang shabu.
Dahil dito, agad nilang dinakip si Tabada.
Pangatlong beses nang dinakip ang suspek sa kasong may kinalaman sa ilegal na droga.
May mga pumupunta umano sa bahay ni Tabada para roon gumamit sa halagang P20 hanggang P50.
Patuloy ang imbestigasyon ng kapulisan para matunton ang source ni Tabada at iba pa niyang kasamahan. – Jamil Santos/VBL, GMA Integrated News
