Nahuli-cam sa CCTV ang galawan ng tatlong babae sa ginawang pagsikwat sa pitaka na nasa bag ng biktimang namimili ng mga damit sa isang tindahan sa Taytay, Rizal.
Sa ulat ni Emil Sumangil sa GMA News "24 Oras" nitong Huwebes, makikita na pinaligiran ng tatlong kawatan ang biktima at nagkunwaring namimili rin ng damit.
Sa unang tangka, hindi nagtagumpay ang mga kawatan na makuha ang wallet na nasa bag ng biktima.
Pero hindi nagtagal, nagtagumpay din ang grupo at kitang-kita kung papaano ginamit ng isang kawatan ang ilang damit para takpan ang kanilang ginagawa.
Ayon sa pulisya, grupo kung umatake ang mga kawatan kaya pinag-iingat nila ang mga mamimili at maging mapagmatyag sa mga nakapalig sa kanila.
Pinaigting na rin ng pulisya ang kanilang police visibility para maprotektahan ang publiko.--FRJ, GMA News
