Patay na nang matagpuan ang isang tricycle driver na pinaniniwalaang pinagbabaril ng riding in tandem sa Barangay Bambang sa Pasig Huwebes ng gabi.
Kinilala ang biktimang si Noel Rohemargate, 31.
Sa ulat ni Bam Alegre sa Unang Balita nitong Biyernes, nakitang nakahandusay sa kalye ang biktima na may mga tama ng bala ng baril sa katawan.
Sa panayam kay John Adrian Sapnu, barangay security force, dumating ang mga awtoridad sa pinangyarihan ng insidente bandang 11:30 ng gabi. Dumating din ang mga kamag-anak ng biktima.
Anim na basyo ng bala ng baril ang natagpuan sa lugar. Patuloy pang iniimbestigahan ng mga awtoridad ang motibo sa pamamaril at pagkakakilanlan ng mga salarin.—Sherylin Untalan/AOL, GMA News
