Tatanggap na rin ng mga turistang fully vaccinated ang Puerto Galera kahit wala nang ipakitang negative swab test. Ang mga hindi pa fully vaccinated, puwede naman sa antigen tests na libre.
“Kapag fully vaccinated na po ang aming mga turista hindi na po kailangan ng RT-PCR,” ayon kay Carmela Datinguinoo, municipal administrator ng Puerto Galera sa ginanap na Laging Handa public briefing,
Gagawin umano ang libreng antigen tests sa mga hindi pa bakuna sa Batangas City Grand Terminal.
Sinabi rin ni Datinguinoo na kasama sa mga makikinabang sa free antigen tests ang mga residente ng Puerto Galera.
Tinatayang mayroong 1,000 tourista ang dumadayo sa Puerto Galera bawat araw.
Hanggang nitong Lunes, mayroon lamang limang aktibong kaso ng COVID-19 ang Puerto Galera,
Sinabi rin ni Datinguinoo na 100% ng economic frontliners sa kanilang lugar, kabilang ang mga tourism worker ay fully vaccinated na. — FRJ, GMA News
