Isang babae ang nahablutan ng bag at nakaladkad ng dalawang snatcher na naka-motorsiklo sa Sampaloc, Maynila.
Ayon sa isang ulat sa 24 Oras nitong Linggo, naglalakad ang dalawang babae noong Huwebes ng gabi sa tapat ng isang drug store sa Magsaysagy Boulevard nang may dumaan na dalawang lalaking nakamotorsiklo.
Hinablot ng lalaking nakaangkas ang bag ng babae at nakaladkad ito at napagulong. Muntik ding masagasaan ng kasunod na kotse ang babae.
Nagtamo ng sugat ang biktima.
Nitong Linggo, nahuli ang dalawang suspect sa isang checkpoint sa Manila North Cemetery dahil walang helmet at plaka ang motorsiklo. Umamin din ang dalawa sa krimen.
Nakuha sa dalawang suspect ang bag ng biktima, mga ID nito, wallet, at tseke pero hindi na nabawi at pera at cellphone. Nakuha rin ang isang kalibre .38 at mga bala. Magsasampa raw ng reklamo ang biktima. — Ma. Angelica Garcia/BM, GMA News
