Nasawi ang isang aso matapos itong paghahampasin ng isang lalaki sa Cagayan de Oro City. Paliwanag naman ng lalaki, kinakagat daw ng aso ang mga alaga niyang kambing at manok.
Sa video ng CDO Pet Adoption na ipinakita sa "24 Oras Weekend" nitong Sabado, makikita ang aso na walang tigil sa pagtahol.
Ilang saglit pa ang lumipas, lumapit ang lalaki at pinaghahampas ang aso hanggang sa lumupaypay ito.
Nagpatuloy pa rin sa panghahampas ang lalaki kahit na nakahandusay na ang aso.
May nagsumbong sa insidente kaya tinungo ng pulisya ang lalaki na kinilalang si Alfredo Legason.
Itinanggi ng lalaki ang krimen, at nagpaliwanag na itinaboy niya lang ang hayop dahil sa pangangagat nito sa mga alaga niyang kambing at manok.
Duda naman sa pahayag ng lalaki ang CDO Pet Adoption. Desididong kasuhan ng grupo ang lalaki sa paglabag sa Animal Welfare Act. — Jamil Santos/DVM, GMA News
