Inilarawan ni Pauleen Luna si Baby Tali bilang "kryptonite" ng kaniyang asawang si Vic Sotto. Hindi raw kasi kayang hindian ni Vic ang hiling ng kanilang anak.
Sa podcast na "Surprise Guest with Pia Arcangel," inilahad ni Pauleen na "daddy's girl" si Tali.
"She goes to mom when she needs something. But if she wants something, it's her dad," saad ni Pauleen. "'Kryptonite' niya si Tali. Kahit anong gusto nu'ng bata."
Ikinuwento ni Pauleen na bago nito, may mga pag-aalala si Bossing kung paano siya makikipag-bonding sa kanilang anak na babae dahil matagal na mula nang huling nagkaroon ng anak si Vic.
Pero nagbago raw ang lahat at nawala ang mga pag-aalala nang dumating si Tali.
"But then Tali came, and parang she opened a whole new world for us. She's so gentle, she's so kind and loving and sweet. She's so generous with her words, with expressing her love for us," ani Pauleen.
"I don't know if it's the pandemic's doing, but she's so maka-magulang talaga. Super close. She would choose us over other kids anytime," dagdag pa niya.
Sa gabi pa nga raw, madalas sabihin ni Tali sa kaniyang mga magulang ang "I miss you mom," "I miss you dad," "I need you."
"She's clingy but she's not dependent. She can do things on her own. But she just prefers na magkakasama kaming lahat all the time. Kaya hindi siya mahindian ng daddy niya. Kasi her personality is really nice," sabi ni Pauleen.
Wala rin daw silang karanasan na nag-tantrums o naglupasay si Tali para makuha nito ang gusto.
"You can really talk to her. You can tell her, you can explain it to her and she would understand. Kaya hindi kami nahirapan. So siguro si daddy mas lumalambot kasi nga she's very easy," kuwento pa ni Pauleen. --FRJ, GMA News
