Ibinahagi sa Instagram ni GMA Films president Annette Gozon-Valdes ang video nang pagbati ni John Lloyd Cruz sa bagong Kapuso na si Bea Alonzo via Zoom call.
“Congratulations, Bea!,” malambing na sabi ng aktor sa kaniyang dating leading lady.
"Idan, makikita ba kita dito," sabi ni Bea.
Dugtong naman ni Miss Annette, "Sabi ko nga sumunod na siya dito."
“Halika na!” pag-aya ni Bea, na Idan ang tawag sa aktor.
Bukod kay John Lloyd, bumati rin kay Bea ang direktor na si Bobot Mortiz.
Ngayong Huwebes, opisyal nang kapuso si Bea matapos pumirma ng kontrata sa GMA.
Nakatakda silang gumawa ng pelikula ni Alden Richards, na inspired sa Japanese series na “Pure Soul,” na ni-remake naman bilang South Korean movie na “A Moment to Remember.”
Samantala, matapos ang ilang taong pamamahinga, napanood si John Lloyd sa GMA nitong nakaraang buwan sa isang special ng online shopping app.– FRJ, GMA News
