Pagkatapos ng walong taong pagtatago, naaresto ng mga awtoridad ang isang construction worker na gumahasa umano sa kaniyang 14-anyos na hipag sa Nueva Vizcaya.
Sa ulat ni James Agustin sa Unang Balita nitong Huwebes, lumalabas sa imbestigasyon na matapos ang umano’y pang-aabuso noong 2015 ay nagtago na ang suspek sa iba’t ibang lugar tulad ng Montalban, Payatas, at Cubao.
"Palipat-lipat siya ng tirahan, kung saan-saan siya nagtago. Partikular dito sa bayan ng Montalban sa area ng Payatas at Cubao, Quezon City," ani Police Lieutenant Colonel Roldante Sarmiento, hepe ng Payatas Bagong Silangan Police Station.
Inihahanda na ang mga dokumento para sa return of warrant ng suspek na naging ika-pitong Most Wanted Person din ng QCPD Station 13. —Jamil Santos/VAL, GMA Integrated News
