Kaagad na nasawi ang isang tricycle driver at isang rider ng motorsiklo nang magsalpukan ang kanilang sasakyan sa Calapan City, Oriental Mindoro.
Sa ulat ni Denice Abante sa GMA Regional TV "Balitang Southern Tagalog" nitong Martes, kinilala ng pulisya ang mga nasawi na sina Noel Buesa, 36-anyos, at Arnold Samson, 36.
Tatlo rin ang sugatan at dinala sa ospital na angkas ng motorsiklo at sakay ng tricycle.
Ayon sa pulisya, nangyari ang insidente nitong Lunes ng gabi sa national highway sa bahagi ng Barangay Sta. Isabel.
Inihayag umano ng nakasaksi sa insidente na mabilis ang takbo ng motorsiklo.
Patuloy na iniimbestigahan ng mga awtoridad ang insidente, ayon sa ulat.--FRJ, GMA News
