Puwede nang hindi magsuot ng face mask ang mga tao sa labas ng kanilang bahay at sa mga open space sa Cebu City.

Kasunod ito ng pagpirma ni Cebu City Mayor Michael Rama nitong Miyerkules ng executive order na nag-aalis ng mandatory face mask policy sa outdoor at open spaces dahil sa COVID-19 pandemic.

Batay sa Executive Order No. 5, nakasaad na ang paggamit at pagsusuot ng face masks sa Cebu City ay idineklara nang “non-obligatory.”

Sa halip, ang paggamit ng face mask ay nasa tao na bilang “self preservation and protection under the principle of shared responsibility and mutual respect.”

Nakasaad din sa EO 5 na panahon na para baguhin ang patakaran sa paggamit ng face mask “as the lethal effect of the pandemic is already wearing off and that vaccination has been proven to be an effective means in containing the spread and the impact of COVID-19."

“Most people remain uninformed as to the protection offered by the kind of face mask and the proper way of wearing the same, so long as they have complied with the mandatory wearing of face mask and even just for a show while it cost money and offers inconvenience,” ayon sa EO.

“On the other side, the long and mandatory wearing of face mask had affected the person as a biopsychosocial and spiritual being,” dagdag nito.

Patuloy naman ang paggamit ng face mask sa mga ospital, klinika, at iba pang medical o diagnostic facilities.

Ipapaubaya naman sa mga pamunuan ng mga establisimyento, negosyo, at iba pang mga gusali kung oobligahin pa nila ang pagsusuot ng face mask.

Pinapayuhan din ng Cebu City government ang mga immunocompromised, maysakit, at nakararanas ng flu-like symptoms na manatili sa bahay o magpatingin sa duktor.

Kailangan din silang magsuot ng face mask lalo na kung lalabas ng bahay.

Hinihintay pa ng GMA News Online ang reaksyon ng Department of Health (DOH) sa naturang ordinansa ng lungsod.

Samantala, hindi na muna nagbigay ng komento si Press Secretary Trixie Cruz-Angeles, tungkol sa naturang usapin.

"There is no reaction yet from the Palace on this one. It may be taken under advisement although we do respect the mandates of local governments over their own jurisdictions," anang opisyal.

"If this is brought up then we will make such an announcement. We are also waiting for the reaction of the DOH on this one, so without all of that info coming in, there will be no statement yet," dagdag niya.

Nauna nang inihayag ng DOH na makabubuti pa ring ipatupad ang minimum public health standards, tulad ng pagsusuot ng face mask dahil mayroon pa ring hawahan ng virus.

Inirerekomenda rin ng DOH ang patuloy na pagpapabakuna o booster shots bilang panlaban sa virus.

Inihayag ito ng DOH matapos na magpalabas ng executive order noong Hunyo si Cebu Governor Gwendolyn Garcia na gawing optional na ang pagsusuot ng face mask sa mga well-ventilated at open spaces sa lalawigan.  — FRJ, GMA News