Patay ang isang menor de edad sa Imus, Cavite, matapos barilin umano ng kinakasama ng kaniyang tiyahin dahil daw sa naka-unplug na internet connection.
Ayon sa ulat ni Mai Bermudez sa Unang Balita nitong Martes, tama ng bala sa dibdib ang ikinamatay ng 12-anyos na biktima.
Biyernes daw ng gabi nang magkaroon ng pagtatalo sa pera ang suspek na si Reynaldo Managan at kaniyang kinakasama na tiyahin ng biktima.
Matapos nito, nanuod daw ng TV ang suspek at napansing nawalan ito ng signal. Lumabas siya ng kuwarto at nakitang na-unplug pala ang koneksiyon ng kanilang internet.
Kinumpronta raw ng suspek ang biktima hanggang sa kumuha na siya ng baril at binaril ang bata.
Dead on the spot ang biktima habang nakatakas naman ang suspek na napag-alamang isang dating sundalo.
Tumangging magbigay ng pahayag ang pamilya ng biktima. —KBK, GMA News
