Arestado ang isang construction worker sa San Jose del Monte, Bulacan dahil sa panghahalay umano sa isang 15-anyos na babae. Depensa ng suspek, nobya niya ang biktima.
Sa ulat ni Emil Sumangil sa GMA News "24 Oras" nitong Miyerkules, sinabing inaresto si Junior Mahusay matapos magsumbong ang tiyahin ng biktima tungkol sa ginagawa ng suspek sa kaniyang pamangkin.
Hindi umano ito ang unang pagkakataon na inabuso ng lalaki ang biktima. Kaya nang matanggap ang impormasyon na sinundo ng suspek ang biktima na kapitbahay niya, hinuli siya sa akto habang ginagawa ang kahalayan.
Ngunit depensa ni Mahusay, nobya niya ang babae at tutol lang daw sa kanilang relasyon ang kaanak ng babae.
Pero sabi ni SJDM police chief Police Major Julius Alvaro, hindi alam ng biktima na dadalhin siya sa madamong lugar ng suspek.
Mahaharap si Mahusay sa reklamong rape at child abuse.--FRJ, GMA News
