Kabilang sina Alden Richards, Marian Rivera, at Dingdong Dantes sa mga tumanggap ng Box-Office Heroes award sa katatapos na 7th Eddys Awards.
Kasama nila sina Piolo Pascual, Julia Montes, at Kathryn Bernardo sa ginanap na awarding ceremony nitong Linggo sa Marriott Grand Ballroom sa Pasay City.
Nitong nakaraang taon, bumida sina Alden at Julia sa "Five Breakups and a Romance," na kumita ng mahigit P100 milyon sa gross sales worldwide. Tumanggap diin ng Best Actress award si Julia, kasama si Charlie Dizon.
Samantala, bumida naman sina Marian at Dingdong sa Metro Manila Film Festival entry na "Rewind," na kumabig ng P889 milyon na worldwide sales at naging highest grossing Filipino film of all time.
Itinatag noong 2015, ang Eddys o The Entertainment Editors' Choice, na taunang nagbibigay ng pagkilala sa mga artista, direktor, at iba pang kasapi ng Philippine film industry.
Kabilang sa mga kinilalang Movie Icon Awardees ngayong taon sina Nova Villa, Leo Martinez, Lito Lapid, Eva Darren, at Gina Alajar.
Best Actor si Piolo Pascual para sa “Mallari,” at Best Director si Jun Robles Lana para sa “About Us But Not About Us,” na hinirang din na Best Picture.--FRJ, GMA Integrated News
