Inaresto ang limang katao kaugnay ng pagnanakaw sa mga alagang aso ni Lady Gaga at panunutok ng baril noong Pebrero, ayon sa spokesman ng Los Angeles police.
Sa ulat ng Reuters, hindi muna nagdetalye ang mga awtoridad hinggil sa mga inaresto.
Naibalik ang dalawang aso ng international singer dalawang araw matapos silang manakaw sa Hollywood.
Matatandaang nilalakad ng dog walker na si Ryan Fischer ang mga aso ni Lady Gaga noong Pebrero nang maganap ang insidente.
Nakuha ang mga French bulldog ni Lady Gaga na sina Koji at Gustav, habang nakatakas ang ikatlong aso na si Miss Asia at natagpuan kalaunan.
Ayon kay Los Angeles Police Officer Drake Madison, isang lalaki na may hawak na semi-automatic na handgun ang bumaril sa isang lalaki na nasa edad 30, bago tumakas ang salarin sa isang puting sasakyan at may dala-dalang dalawang French bulldog.—Jamil Santos/AOL, GMA News
