May mga bagong makakasama si Willie Revillame bilang co-hosts sa kaniyang afternoon variety-game show na "Wowowin."
Sa Star Bites report ni Cata Tibayan sa GMA News "Balitanghali" nitong Miyerkoles, sinabing magiging bahagi na ng "Wowowin" sina Miss Philippines Earth 2018 Celeste Cortesi, 2018 Miss Eco Tourism Philippines Halimatu Yushawu at Kapuso star Kelley Day.
"I was a little bit nervous but you know what, during on the stage, I felt really comfortable with all the people, with the cast, so I'm very excited," sabi ni Celeste, na abala ngayon bilang kandidata at host ng Miss Earth pageant.
Sabi naman ni Halimatu, "Sa Wowowin natural na natural na lumalabas 'yung tawanan. Naipapalabas namin 'yung natural na kami."
Hindi naman daw inasahan ni Kelly na magiging bahagi na siya ng "Wowowin" matapos siyang bumisita sa programa para mag-promote ng isang proyekto.
"Super thankful as well kasi hindi ko in-expect, kasi nu'ng nag-guest lang kami, nag-plug for Barangay 143, he was like 'Gusto mong maging host?' I was like, medyo like overwhelmed din ako, like 'Is this really happening?' Tapos after, like the next day nag-taping na ako and naging part na ako ng family," ayon kay Kelley.
Samantala, ang mga fellow Miss Earth candidates naman ni Celeste, nagkaroon din ng chance na magpahinga mula sa kabi-kabilang pre-pageant activities.
Pinaghandaan sila ng intimate dinner na kasama si Willie kaya nagawa nilang makapag-relax.
Hindi naitagong nag-enjoy at panay picture sila sa breath taking view ng penthouse ng Wil Towers.
Hindi rin nila makakalimutan ang pananatili sa Pilipinas dahil sa mainit na pagtanggap ng mga Pilipino.
Nabighani pa nga sa ganda ng Romblon si Miss Cyprus Maria Armenaki.
"I don't have any words to describe how beautiful it is. It's so beautiful, and I wish to go back again there as well," sabi ni Maria.
Kaya naman hindi na nila inintindi ang diet dahil sa sarap ng pagkaing Pinoy.
"We're always excited for dinner. Everyday we're always like 'Oh I'm so hungry, when is dinner?'So we were not really on a diet, sabi ni Miss Austria Melanie Mader.-- FRJ, GMA News
