Hiniling ng kampo ni Vice President Sara Duterte na ibasura na ng Supreme Court ang inihaing petisyon laban sa paglilipat ng P125 milyon na confidential funds sa kaniyang tanggapan noong 2022.
Sa 19-na pahinang komento, sinabi ni Duterte na dapat ibasura ang petisyon dahil wala itong ipinakitang aktuwal na kaso o kontrobersiya sa paglilipat at paggamit ng pondo.
Wala rin umanong nakasaad na alegasyon na inabuso niya ang kaniyang kapangyarihan.
“No question, no matter how interesting or compelling, can be answered by this Court if it cannot be shown that there is an ‘actual and antagonistic assertion of rights by one party against the other in a controversy wherein judicial intervention is unavoidable’,” ayon sa komento.
Sa unang petisyon na inihain noong November 2023, iginiit na dapat ibalik ang confidential funds ng OVP sa government treasury.
Kinukuwestiyon ang legalidad ng paglilipat ng naturang pondo bilang confidential funds ng OVP mula sa contingency fund ng Office of the President.
Kabilang sa petitioners sina dating Commission on Elections (Comelec) chairperson Augusto Lagman, 1987 Constitution framer Christian Monsod, dating Department of Finance Undersecretary Maria Cielo Magno, Chairperson of the Commission on Filipinos Overseas (CFO) Imelda Nicolas, Atty. Ibarra Gutierrez III, Katrina Monsod, Ray Paolo Santiago, Honorio Poblador III, Vicente Romano III, Rex Drilon, at Miguel Jugo.
Bukod dito, naghain din ng hiwalay na petisyon laban sa confidential funds ng OVP, ang Makabayan bloc solons ng Kamara de Representantes, noong December 2023.
Nais ng grupo na ibalik ng OVP ang naturang pondo, at ideklara ng SC na unconstitutional ang ginawang paglilipat ng pondo.
Ilang abogado, at dating opisyal din ang naghain ng hiwalay na petisyon tungkol sa naturang usapin, gaya nina dating Justice Antonio Carpio, Atty. Howard Calleja, JP Calleja, at dating senator Richard Gordon.
Giit ng kampo ni Duterte, dapat may aktuwal na kaso o kontrobersiya bago desisyon ng korte ang isang usapin.
“None of the petitions present an ‘actual case or controversy’ and none of the petitioners alleged a ‘legally demandable and enforceable right,’ which calls for the exercise of ‘Judicial Power.’ The petitions are mere apprehension and speculation about contingent funds or confidential funds, which does not constitute a justiciable controversy,” paliwanag nito.
“It is important to state that courts do not sit to adjudicate mere academic questions to satisfy scholarly interest therein, however intellectually solid the problem may be,” dagdag ng kampo ni Duterte.
Noong Agosto 2023, iginiit ng pangalawang pangulo na walang iregularidad kung papaano niya ginamit ang naturang pondo.
Una rito, sinabi ng Commission on Audit, na ginamit ng OVP ang P125 milyong pondo sa loob ng 11 araw noong December 2022. — mula sa ulat ni Joahna Lei Casilao/FRJ, GMA Integrated News