Mahigit P200 milyon na ang jackpot prize sa Ultra Lotto 6/58 na mayroong draw sa Martes, June 6, 2023. Samantala, kapuwa may tig-isang mananaya naman ang tumama sa Grand Lotto at Megalotto draws nitong Lunes, June 5, 2023.
Sa website ng Philippine Charity Sweepstakes Office, nakasaad na isang mananaya ang nanalo sa Grand Lotto 6/55 draw matapos niyang mahulaan ang lumabas na mga numero.
Ang mga numero ay 11-17-28-06-09-01, at may nakalaang premyo na P29,700,000.00.
Sa kasabay nitong Megalotto 6/45, isa rin ang tumama ng P8,910,000.00, matapos niyang mahulaan ang mga numerong lumabas na 22-08-20-02-01-45.
Samantala, umabot na sa P202,796,480.80 ang jackpot prize sa Ultra Lotto 6/58, matapos na walang nanalo sa draw nitong Linggo, na ang lumabas na mga numero ay 31-04-52-54-10-56.
May bola ng Ultra Lotto 6/58 sa Martes, kasabay ng Super Lotto 6/49 at Lotto 6/42.
Huling tinamaan ang jackpot sa Ultra Lotto 6/58 noong Marso 12, 2023 na may jackpot prize na P49 milyon. Bago nito, may naunang tumama ng P109 milyon na premyo sa nasabing lotto game noong Marso 7, 2023.
Binobola ang Ultra Lotto 6/58 tuwing Linggo, Martes, at Biyernes. --FRJ, GMA Integrated News
