Patay ang tatlong menor de edad nang ma-trap sa sunog na sumiklab sa kanilang tirahan sa Barangay Tatalon, Quezon City nitong Linggo ng madaling araw.

Nailigtas naman ang kanilang sanggol na kapatid matapos siyang ihagis ng kanilang ama sa bintana at nasalo ng isang kapitbahay, ayon sa ulat ni Luisito Santos sa Super Radyo dzBB.

 

 

 

Sumiklab ang sunog sa three-storey na residential building sa Kaliraya Street ng 4:19 a.m. habang natutulog ang pamilya.

 

 

Ayon sa ama, nagulat na lang ang kanyang misis nang nagising dahil may usok sa kanilang kuwarto na nasa ikatlong palapag ng gusali.

Pagbukas nila ng pintuan ng kanilang kuwarto ay bumulusok na raw ang apoy at mausok na.

Tumakbo sila at humingi ng tulong, at gumapang ang ama habang bitbit ang sanggol na apat na buwang gulang pa lamang.

Bumaba sila sa ikalawang palapag at inihagis nang ama ang sanggol sa bintana, na nasalo naman ng isang kapitbahay. 

Tumalon din mula sa bintanang ito ang ama at ang kanyang misis at ang panganay nilang anak.

Sa kasamaang palad ay na-trap ang tatlo pang bata na nasa ikatlong palapag. Sila ay nasa edad 9, 8, at 4 na taong gulang.

Nagtamo naman ng mga injuries ang ama, ang kanyang misis, at ang panganay na anak.

Wala naman ni isang galos ang sanggol.

 

 

Umabot lamang sa unang alarma ang sunog bago ito naapula bandang alas-singko ng umaga.

Ayon sa Bureau of Fire Protection (BFP), nahirapan ang mga bumbero dahil makipot ang daan.

Kasalukuyang iniimbestigahan ng BFP ang posibleng pinagmulan ng sunog, na hinihinalang dulot ng problema sa electrical wiring.

Samantala, naroon na sa pinangyarihan ng insidente ang mga tauhan ng crime laboratory.

 

 

 

—KG, GMA News