Patay ang isang 18-anyos na lalaki nang magulungan siya ng hulihang gulong ng isang 14-wheeler truck sa Tondo, Maynila.
Sa ulat ni Mae Bermudez sa GMA News "24 Oras" nitong Lunes, kinilala ang biktima na si Alberto Abel, na hindi na umabot nang buhay sa ospital.
Sa kuha ng CCTV camera ng Barangay 94, makikita ang biktima na naglalakad kasama ang isang kaibigan.
Nakasabay nila ang isang malaking truck na marahan lang ang takbo, hanggang sa mahagip ng hulihang gulong ang biktima.
Ayon sa opisyal ng barangay, gumagamit ng cellphone at naka-earphone umano ang biktima.
Sinabi ng ina ng biktima na dapat ayusin ng mga lokal na opisyal ang safety measures sa lugar para hindi na maulit ang nangyaring trahediya.
Nasa kostudiya ng mga awtoridad ang driver ng truck driver na mahaharap sa reklamong reckless imprudence resulting in homicide. --FRJ, GMA News
