Nakalusot sa inspeksyon ng mga Customs officer sa Futian Port sa China ang bag na bitbit ng isang babae pero hindi ang kaniyang bra na gumagalaw na tila may sariling buhay.
Sa video ng GMA Integrated News Feed, makikita na ipinatabi ng customs ang babae na patungong Hong Kong para isalang sa full body inspection at strip search.
Nang suriin ang kaniyang dibdib, doon na nakita ang maliliit na mesh bags na nakaipit sa kaniyang bra.
Kaya pala gumagalaw ang kaniyang bra, nasa loob ng mga bag ang 16 na buhay na sailfin lizards o sailfin dragons, na itinuturing nang threatened species.
Ipupuslit daw sana ng babae ang mga hayop patungong Hong Kong para doon ibenta.
Dati nang may nahuli sa ganitong modus na iniipit sa bra ang mga maliliit na hayop na gustong ipuslit gaya ng mga makukulay na ahas.-- FRJ, GMA Integrated News
