Mistulang 'thou shall not pass' ang hirit ng isang buwaya sa mga commuter nang tumambay ito sa isang footbridge sa Rio de Janeiro sa Brazil.
Sa video ng GMA News Feed, sinabing kasinglaki ng karaniwang taas ng tao ang haba ng buwaya.
Walang nagawa ang mga commuter na papunta sa bus terminal kung hindi ang magkumpulan muna sa isang bahagi ng footbridge habang hinihintay ang mga awtoridad na kukuha sa buwaya.
May rampa na paakyat sa footbridge kaya hindi mahirap sa buwaya na makaakyat.
Karaniwan na raw na nakakakita ng buwaya sa lugar dahil napapaligiran ito ng mga bakawan at lagoon na tirahan nila.
Matapos ang paghihintay, dumating ang mga bumbero na siyang kumuha sa buwaya at ibinalik siya sa lawa.
--FRJ, GMA News
