Hindi regalo kung hindi posas at pangwasak ng pinto ang bitbit ng isang pulis na nagbihis Santa Claus at may kasama pang nagbihis duwende para maaresto ang isang drug suspect sa Peru.
Sa video ng Agence France-Presse, makikitang biglang sumugod ng dalawang pulis ang isang bahay sa Lima, Peru para arestuhin ang drug suspect.
Nakipagpambuno pa sila sa suspek bago nila ito napadapa at nalagyan ng posas.
Karaniwan daw na nagbabalatkayo sa bihis ang mga pulis para hindi makahalata ang mga suspek na kanilang aarestuhin.
Ipinakita sa video ang mga nakumpiskang droga sa suspek na may kasama pang baril, cellphone at pera.--AFP/FRJ, GMA News
