Nakuhanan ng video ang ginawang pagnanakaw ng dalawang lalaki sa mga manok na karga ng isang truck sa Cagayan De Oro City.
Sa ulat ni James Paolo Yap sa GMA Regional TV News nitong Huwebes, makikita sa video na nag-viral na binabagtas ng truck ang isang kalsada sa Bantiles sa Barangay Bugo, Cagayan de Oro City.
Dahil may kabigatan ang daloy ng trapiko sa lugar, may kabagalan lang ng takbo ng truck.
Sinamantala iyon ng dalawang lalaki na ang isa ay sumampa sa truck para dukutin ang mga buhay na manok, at iniaabot sa kasamahan niyang nakabuntot sa sasakyan.
Hindi nabatid kung ilan ang manok na kanilang nakuha.
Nangyari ang pagnanakaw sa harap ng iba pang mga motorista sa lugar.
Nakarating na sa kaalaman ng pulisya ang insidente at natukoy na umano nila ang pagkakakilanlan ng isa sa mga kawatan.
Magdadagdag na rin umano sila ng tauhan na magpapatrolya sa lugar.
Kadalasan umanong nasasangkot sa mga nakawan sa lugar ang mga dating bilanggo na nakalaya.
Umaasa rin ang pulisya na makikipagtulungan sa kanila ang mga biktima para pormal na masampahan ang reklamo ang mga kawatan.--FRJ, GMA News
