Proud na inilahad ng direktor na si Mark Reyes na nakapag-taping na ang mga Sangg’re ng Encantadia 2016 na sina Sanya Lopez, Kylie Padilla, Glaiza De Castro at Gabbi Garcia para sa inaabangan na bagong “Encantadia Chronicles: Sang'gre.”
Sa kaniyang Instagram, ibinahagi ni Direk Mark na nakapag-“report for duty” na ang apat nang simulan na rin ni Gabbi ang unang taping day niya sa “Sang’gre.”
“And @gabbi makes 4! Avisala Sanggre Alena! Gabbi Garcia also reported for her first day for Sang’gre today. And it feels like nothing has changed,” caption ni Direk Mark.
“But Gabbi quickly remembered how tricky the Filipino lines are for Encantadia. ‘I better stop talking in English!’ she jokes after she trips on a few words like ‘Lireo’. Well I just wanted to roll call the ‘reporting for duty moments’ of your favorite Sang’gres. We still have a lot of casting surprises for you… just wait for it!,” pagbabahagi pa ng direktor.
Sa hiwalay na post, masaya ring ibinahagi ni Direk Mark na nag-report for duty na rin si Solenn Heussaff, na gumanap bilang si Cassiopea noong 2016.
Sa Chika Minute report ni Aubrey Carampel sa GMA News 24 Oras nitong Martes, sinabi ni Gabbi na nostalgic para sa kaniya ang unang taping day sa “Encantadia Chronicles: Sang'gre.”
Ayon kay Gabbi, medyo nanibago siya sa muling pagsasalita ng Enchan at malalim na Tagalog.
“Nakakatuwa because everybody’s just really getting back into their characters. Parang naka-engrave na siya sa akin. Noong sinuot ko ‘yung costume ko automatic si Alena ulit ako,” sabi ni Gabbi.-- Jamil Santos/FRJ, GMA Integrated News
