Inihayag ni Faith Da Silva na kasama sa kaniyang mga plano ang pagsali sa mga beauty pageant.
"About the other question, kasama siya sa mga plano ko. Pero hintayin na lang ng mga tao. It's a surprise!" saad ni Faith sa Kapuso Showbiz News.
Hindi naman nagdetalye si Faith kung anong pageant ang kaniyang sasalihan at kung kailan ito magaganap.
Sa kaniyang mga naunang panayam, sinabi ni Faith na pangarap na niyang maging beauty queen noon pang bata siya.
May katangkaran din si Faith na may height na 5'6, pero sinabi niya noon na aaralin niya muna ang pagsagot sa mga Q&A, at magfo-focus muna siya sa pag-aartista at sa pag-aaral.
Hindi rin maiwasan ng ilang tao na mapansin ang pagkakahawig ni Faith sa beauty queen na si Pia Wurtzbach.
"I'm very, very happy every time I hear that compliment. Kasi sino ba naman ang hindi matutuwa 'di ba, na kamukha ka ni Pia Wurtzbach, napakagandang babae. At saka she is very confident at nakita mo na mabait talaga siya, na nase-sense ko 'yung ganu'ng aura niya. And isa siya sa mga hinahangaan ko talaga since before pa," sabi ni Faith.
Kabilang si Faith sa cast ng upcoming series na "Las Hermanas," na nagsisilbing comeback show din ni Albert Martinez sa Kapuso Network. —LBG, GMA News
