Inaresto nitong Martes ang internet sensation at dating Hasht5 member na si Xander Ford.
Kinumpirma ito sa Facebook live ng kaniyang talent management na Star Image Artist Management nitong Martes ng gabi.
Ayon sa post, nakakulong sa isang presinto sa Tondo, Maynila si Xander dahil mayroon na itong arrest warrant sa kasong isinampa ng kaniyang dating nobya.
Paglilinaw ng kaniyang management, tutulungan nila si Xander kahit pa umalis ito sa kanilang poder at hindi nakikipag-ugnayan sa kanila.
Pero sa sandaling lumitaw sa paglilitis na korte na nagkasala ang kanilang artista ay dapat daw nitong panagutan ang anumang desisyon.
Sa video, makikita si Xander na nasa loob ng selda at iginiit ng kaniyang management na hindi gimik o gawa-gawa ang pagkakaaresto sa kaniya.
Aalamin ng management ni Xander kung maaari siyang makapagpiyansa para makalaya habang dinidinig ang kaso.
Nakiusap din sila sa publiko na huwag kaagad husgahan si Xander at hintayin na umusad ang pagdinig sa kaso. --FRJ, GMA News
